සිරුර නිරෝගී කරන උදේ ආහාරය

උදේ ආහාරය රජෙක් වගේ ගන්න කියන වාක්‍ය මොනතරම් ගායනා කළත් බොහෝ දෙනෙක් උදේ ආහාරය මග හරිනවා. වෙලාවක් නැතැයි යන සම්ප්‍රදායික වගන්තිය ඔස්සේ තමන්ගේ නිදහසට කරුනු කිව්වත් උදේ ආහාරය ලබා ගැනීම ඉතාම වැදගත්. උදේ කෑම තමයි දවසේ කෑම වේල් අතරින් වඩාත් වැදගත්ම කෑම වේල කියන එක අපි හැමෝම අහලා තියෙනවා නේ.
ඒ වගේම තමයි උදේ ආහාරයට අඩුම තරමින් ආහාර කාණ්ඩ තුනක්වත් එකතු විය යුතුයි. ඒ අතරට ධාන්‍ය, එළවළු සහ පළතුරු වගේම මස් , මාළු වැනි දේ ඇතුලත් වීම වැදගත්. කිරි වලින් ලැබෙන්නේ එක් ආහාර ඛණ්ඩයක් විතරයි. නමුත් අද සමාජයේ තියෙන කාර්යබහුලත්වයත් එක්ක බොහෝ දෙනා උදේ ආහාරය ලෙස පිටි කෑම එහෙමත් නැත්නම් ක්ෂණික ආහාර ගන්න පුරුදු වෙලා ඉන්නවා .
අපිට හැදෙන තරමක් ලෙඩ හැදෙන්නේ කන බොන කෑම බීම නිසා. කිසිම දවසක උදේ කෑම විදිහට පාන්, පාන්පිටි ඉඳිආප්ප, බර්ගර්, බනිස්, පොල් රොටී ආදිය කන්න එපා. ඒ වෙනුවට කන්න පුළුවන් දවසම නීරෝගීව ශක්තිමත්ව ඉන්න පුළුවන් ආහාර වට්ටෝරු කීපයක් ගැනයි Share Care ඔබ වෙත රැගෙන ආවේ .

උදේට දියබත්

රෑට ඉතිරි වූ බත් ටික හොඳින් පිරිසිදුව වසා තබන්න. උදේට ඒ බත් වලට පොල්කිරි ටිකක්, ලියාගත් රතුළූණු අහුරක්, ලියාගත් අමූමිරිස් කරල් දෙකක්, කරපිංචා කොළ ටිකක් දමා මදක් රත්කර ටික වේලාවක් තබා කෑමට ගන්න. ඉතාම ගුණදායක ඇඟ සිසිල් කරන උදේ ආහාරයක්. ගිනියම් දහවලේදී ඔබට කිසිම අපත්‍යයක් වෙන්නේ නැහැ. දවස පුරාම බඩ සිසිලසින් තිබේවි. ඇඟට පුදුමාකාර ශක්තියකුත් ලැබේවි.

පැළවූ මුං ඇට සමග ලුණු මිරිස්

මුං ඇට තම්බලා කන එක හරිම ජනප්‍රිය උදේ කෑමක්නේ. දවසක යන්තමට පැළවීගෙන එන මුං ඇට තම්බලා කන්න. මුං ඇට තැම්බූ වතුර ටිකත් බොන්න. එය කිසිම දවසක විසි කරන්න එපා. කලින් දවසේ හවස පහට පමණ මුං ඇට දියේ දාන්න. ප්‍රමාණවත් වතුර ප්‍රමාණයක් දමා හොඳින් වසා තබන්න. පසුදා බලද්දි යන්තමට පැළවීගෙන එන මුංඇට ඔබට දැකගන්නට ලැබේවි. එම වතුර වලින්ම තම්බාගන්න. පසුව පෙරාගන්න. මුං ඇට තැම්බූ වතුර ටික වෙනම වීදුරුවකට ගෙන එය පානය කරන්න. මුං ඇට රසවත්ම ලුණු මිරිස් ටිකක්, පොල් ටිකක් සමඟ ආහාරයට ගැනීමෙනුයි. කකුල් පැලිලා, ඇස් වේලිලා දන්නට පටන්ගෙන තොල් වේලිලා දුක් විඳින උෂ්ණ රෝග රැසකට මෙය ඉතාම ගුණයි. එසේම අධික ගිනියම නිසා කොණ්ඩෙ යන අය මේ පැළවූ මුං ඇට තම්බාගත් වතුර මාසයක් පමණ බිව්වොත් හිසකේ ගැලවී යාම නවත්වාගත හැකියි.

මුං ඇට හකුරු කිරිබත්

මෙතරම් ගුණදායක කෑම තියාගෙනයි අපි පාන් පිටි ගිලින්නේ. ඒකනේ මේ තියෙන දුකත්. මේක ඇත්තටම අපරාධයක්. කිරිබත් හදන විට රෝස කැකුළු ගන්න. එයටම දියේ දමාගත් මුං ඇටත් දමන්න. තැම්බීගෙන එන විට පොල්කිරි යහමින් දාන්න. බාගන්නට ටික වෙලාවකට කලින් සූරාගත් හකුරු කෝප්ප භාගයක් දමන්න. හොඳින් මිශ්‍රකර උණුසුම්ව ආහාරයට ගන්න. බලාගෙන සිටිද්දීම තරුණ වෙනවා. ගොඩක් ගිනියම් රෝග අඩුවෙනවා. ඒ වගේම බඩවැල් වල ප්‍රශ්න නිසා දුක් විඳින තත්වය අඩුවෙනවා. හොඳට මල පිටවෙනවා. දවල් එක දෙක වෙනතුරු බඩගින්න එන්නෙත් නෑ.

මුදවපු කිරිබත්

ඇඟට සිසිලසක් ගෙන එන කිසිම අගුණයක් නැති මේ වගේ රහස් කෑම දිනපතා හදාගෙන කෑවොත් පරම්පරාවෙන් එන ලෙඩක් දුකක්වත් ලේසියෙන් වැළඳෙන්නේ නෑ. ඒ වගේම මලබද්ධය සම්පූර්ණයෙන්ම නවතිනවා. ගැස්ට්‍රයිටිස් තිබ්බද කියලා සොයාගන්නවත් බැරි වෙනවා. ඇඟට පුදුමාකාර ශක්තියක් එනවා.
පිසගත් බත් වලට මුදවපු කිරි මේස හැඳි තුනක් දාන්න. හොඳින් මිශ්‍ර කරන්න. වෙනම තාච්චියකට ගිතෙල් ටිකක් දමා එයට අබ ටිකක්, කරපිංචා ඉත්‍තක්, ලියාගත් ළූණු ටිකක් සහ වියළි මිරිස් කරල් දෙකක් දමන්න. හොඳින් තෙම්පරාදු කර මේ තෙම්පරාදුව සාදාගත් මුදවපු කිරිබත් එකට දාන්න. උණුසුම්ව කන්න. දවසම නිරෝගීව ඉන්න පුළුවන්. එව් සිසිලස වෙන දෙයකින් ලබා ගන්න බෑ කියලා ඔබට හිතෙයි.

කිතුල් පිටි කිතුල් හකුරු කැඳ

ජීවිත කාලය පුරාම හොඳ තරුණ ජවයෙන් හොඳ තරුණ මදයෙන් ජීවත්වෙන්න ආසද? ආසාවකටවත් ලෙඩක් දුකක් හැදෙන්නේ නැතුව ජීවත් වෙන්න ආස ද? මූණපුරා අලුත් ප්‍රබෝධයක් දකින්න ආසද? ගස්ගල් පෙරලන්න තරම් ශක්තියක් ඇඟට එනවට ආසද? එහෙනම් මේ කිතුල් පිටි, කිතුල් හකුරු කැඳ පානය දිනපතාම බොන්න. කිරි හෝ වතුර කෝප්ප භාගයක් ලිපේ තියන්න. එය රත් වෙද්දි එයට කිතුල් පිටි මේස හැඳි 04 ක් දමන්න. හොඳින් මිශ්‍ර කරන්න. තලපය වාගේ හැදීගෙන එද්දී එයට පොල් කිරි කෝප්ප කාලක් දමන්න. ලුණු ටිකක් දමා මිශ්‍ර කරන්න. බාගන්න ටික වෙලාවකට කලින් සූරාගත් කිතුල් හකුරු මේස හැඳි 02 ක් දමන්න. මිශ්‍රකරන්න. බාගන්න. උණුසුම්ව බොන්න. පුදුම හිතෙයි.

කුරක්කන් ඉඳිආප්ප සමඟ තෙම්පරාදු පරිප්පු

කුරක්කන් ඉඳිආප්ප කන්න පුළුවන් කෑමක් ද කියලා ඔබට හිතෙනවා ඇති. නමුත් අතීතයේදී කුරක්කන් කාල තමයි මිනිස්සු ශක්තිමත්ව ලෙඩක් දුකක් හදාගන්නේ නැතුව උන්නේ. කුරක්කන් ඉඳිආප්ප කන විදිහක් තියෙනවා. එහෙම කෑවොත් අමාරු නෑ. කුරක්කන් ඉදිආප්ප ටික රෑ හදලා තියලා උදේ ස්ටීම් කරලා ගත්තත් කමක් නෑ. හැබැයි කුරක්කන් සමඟ මේ දැන් තෙම්පරාදු කරපු දුම් දමන පරිප්පු හොද්දක් හදාගන්න. පොල්කිරි ටිකක් යහමින් දාලා මිරිස් කරල් ටිකක්, කරපිංචා ටිකක්, අබ ටිකක් දාලා හොඳ මිරිස් තෙම්පරාදුවක් දාගන්න. හරිම රසට කන්න පුළුවන්. කුරක්කන් ඉඳිආප්ප ටිකක් වැඩියෙන් කෑවත් කමක් නෑ. හොඳ ශක්තියක් එනවා. නමුත් ආරන්නේ නෑ. පිපෙන්නේ නෑ. අමුතු තිබහක් පිපාසයක් එන්නෙ නෑ. ඇඟට සැහැල්ලුයි.

මිශ්‍ර පළතුරු සැලඩ්

උදේට කවුද සැලඩ් කන්නේ. ඔබට එහෙම හිතෙයි. ඒත් මාසයක් මේ වගේ කාලා බලන්නකෝ. වෙන දේ ඔබට හිතාගන්න බැරි වේවි. ඒක අපි කියන්නේ නෑ. කාලා බලන්න. කැමති පලතුරු වර්ග 07 ක් කුඩා කැබලි වලට කපා සීනි නොදමා සැලඩ් එකක් වගේ කන්න. ආස නම් මී පැණි මේස හැදි දෙකක්, අලුත් මුදවපු කිරි මේස හැදි දෙකක් දමාගන්න. රසට කන්න. මාසයක් කාලා බලන්න. ජීවිතයට අලුත් බලාපොරොත්තුවක් ලැබෙයි. වසන්තය ගෙවිලා නෑ කියලා එදාට හිතෙයි.ඔබ නීරෝගීමත් වේවි.

අද ඉදලවත් උදේ ආහාරය මගහරින්නේ නැතුව , උදේ ආහාරයට පාන් පිටි අඩංගු ක්ෂණික ආහාර ගන්නේ නැතුව Share Care අරගෙන ආවා ආහාර රස විදලා බලන්නකෝ .ඔයාට ලොකු වෙනසක් දැනෙයි .

Leave a Reply

Your email address will not be published. Required fields are marked *

error: Content is protected !!